A Asociación Teenses pola Igualdade celebrou a súa Asemblea Xeral Ordinaria o pasado xoves 27 de febreiro na súa sede da Escola Unitaria de Vilanova, en Recesende.
Durante a xuntanza Rosa Martínez Boquete, secretaria da Asociación, fixo balance das múltiples actividades de carácter formativo, informativo e cultural levadas a cabo durante o ano 2019, tanto en solitario como en colaboración con outras entidades. Entre estas salientou a organización de cursos coma o obradoiro de autoestima e de celebracións como a IX Festa das Mulleres con motivo do 8 de marzo, a Gala Xantar Literario co gallo da entrega dos premios do VII Certame de Poesía María Mariño, a VII Edición do Ciclo de Teatro Afeccionado Martabeladas ou o ciclo de conferencias de concienciación contra a violencia de xénero.
Rosa Gómez Limia, presidenta da Asociación, pechou a asemblea amosando a súa satisfacción polo labor realizado e agradecendo a colaboración de todas as persoas implicadas.
