Comprácenos informarvos e convidarvos á interesante charla/coloquio que se vai levar a cabo o vindeiro xoves 14 de marzo, na Casa Común de Cacheiras, ás 20:15 h.
Nesta ocasión contaremos con cunhas poñentes de excepción, dúas científicas recoñecidas a nivel internacional e moi profundamente ligadas co tema da igualdade pois ambas son membros da Comision de Igualdade da Escola Técnica Superior de Enxeñaría, trátase da Profesora Almudena Hospido e da Profesora Mª Encina Calvo.
Falarán sobre as INICIATIVAS PARA A IGUALDADE NO AMBITO UNIVERSITARIO e sobre as INICIATIVAS PARA ACHEGAR REFERENTES FEMININOS EN CIENCIA e TECNOLOXÍA respectivamente.
Almudena Hospido Quintana, é Profesora titular do departamento de Enxeñaría Química da USC, coordinadora do Grao en Enxeñaría Química e responsable académica das prácticas externas do máster en Enxeñaría Ambiental. En investigación, estivo sempre vinculada á aplicación e desenvolvemento de metodoloxías baseadas no pensamento de ciclo de vida. É membro do Grupo de Investigación en Biotecnoloxía Ambiental (BioGroup) e membro adscrito do Centro Interdisciplinar en Tecnoloxías Ambientais (CRETUS). Coordinadora de Relacións Exteriores da USC (09/2013-04/2014) e Vicerreitora de Internacionalización da devandita universidade (09/2015–06/2018), participou como mentora no Programa de Mentoring Científico “Impulso do Talento Investigador” promovido por IMDEA Enerxía e desenvolvido pola Escola de Mentoring (edición 2022-2023).
Mª Encina Calvo Iglesias, é doutora en Ciencias Físicas e profesora titular do departamento de Física Aplicada da USC, forma parte do grupo de investigación Propiedades Termofísicas e de Transporte de Fluídos. Ademáis dos os éxitos na súa carreira profesional, destacamos a grande labor divulgativa en temas de igualdade e a fenda de xénero que existe no campo da ciencia e que prexudica á innovación e polo tanto a sociedade. Está a traballar arreo no tema da incorporación da perspectiva de xénero á docencia e na utilización do cine e a literatura para motivar ao alumnado na aprendizaxe da física e coa sua actividade e publicacións neste campo pretende dar visibilidade ao papel levado a cabo por grandes descoñecidas, mulleres da ciencia a través da publicación de “As Mulleres que nos levaron ao espazo” ou “E ti, que científicas coñeces? “.